KASISI w3Cert.
IbukuNgai

JUDASI

IBUKU RĨA NGAI (1965)
JUDASI

MARŨA MARĨA.MAANDĨKĨIRŨO ANDŨ OTHE NĨ JUDASI

1 NĨ niĩ Judasi, ngombo ya Jesu Kristo na mũrũ wa nyina na Jakubu, ngwandĩka marũa maya makinye kũrĩ andũ arĩa metĩtwo, nĩo arĩa mendetwo na wendani ũrĩa uumaga kwĩ Ngai Ithe witũ, na magaikaragio marĩ a Jesu Kristo.

2

Mũroiguĩrũo tha, na mũingĩhĩrũo nĩ thayũ, o na wendani.

3

Endwa akwa, hĩndĩ ĩrĩa ndĩrerutanĩirie na kĩyo gĩothe kũmwandĩkĩra ũhoro wa ũhonokio fũrĩa tũgwatanĩire na inyuĩ, nĩndĩronire arĩ wega ndĩmwandĩkĩre, nĩguo ndĩmũringĩrĩrie atĩ mũrũagĩrĩre mũgwatĩirie morutani ma Wĩtĩkio marĩa maatigĩirũo andiũ arĩa aamũre o ihinda rĩmwe rĩa kũigana hĩndĩ ciothe.

4

Tondũ nĩkũrĩ andũ amwe metonyereirie thiritũ-inĩ yanyu na hitho, arĩa maathĩrĩirio o tene magatuĩrũo ituĩro rĩrĩ ngũgweta, na nĩ andũ matetigagĩra,Ngai, magakĩgarũra Wega wa Ngai witũ ũtuĩke ũũrathoni, na magakaana ũrĩa wĩ Mũmene na Mwathani witũ o we wiki, na nĩwe Jesu Kristo.

5

Riu-rĩ, o na gwakorũo kwĩ hĩndĩ mwamenyire maũndũ maya mothe o wega mũkaigania-rĩ, nĩngwenda kũmũririkania ũrĩa Mwathani, aarĩkia kũhonokia andũ matuĩke ake akĩmaruta bũrũri wa Misiri, o thutha ũcio agĩcoka akĩnina arĩa matetĩkĩtie.

6

Nao araika, o arĩa mataigana gũkindĩria ũthamaki-inĩ wao, no gũtiga magĩtiga kũndũ kwao kĩũmbe gwa gũtũũra-rĩ, nĩo aarangithĩirie maikarage mohetwo nduma-inĩ na mĩnyororo ĩrĩa ĩtarĩ hingo ĩkohoka, o nginya rĩrĩa cira wa Mũthenya ũrĩa mũnene ũgakinya.

7

Ningĩ o ũndũ ũmwe nao, Sodomu na Gomora, o na matũũra marĩa maakuhanĩrĩirie nakuo o namo nĩmaatũire mahũraga maraya na makeriragĩria kũgwata mĩĩrĩ ĩrĩa ĩgirĩtio kũgwatwo-rĩ; namo matũũra macio nĩmonanĩtio matuĩke kĩonereria gĩa gũkaanania, nĩ ũrĩa maaherithirio nĩ gũcinwo na mwaki ũtahorekaga.

8

No rĩrĩ, o na gũtuĩkĩte ũguo, andũ acio, o ũndũ ũmwe, no methũkagia mwĩrĩ na maũndũ marĩa marotaga na kĩroto, makanyararaga wathani, na makarumaga anene arĩa marĩ na riri.

9

No Mikaeli, mũraika ũrĩa mũnene-rĩ, hĩndĩ ĩrĩa maakararanagia na mũcukani magĩĩtania mwĩrĩ wa Musa-rĩ, ndaigana gweta kũmũruma magĩcira nake, no kuuga oigire atĩrĩ, Mwathani arogũkaania.

10

Ĩndĩ andũ acio-rĩ, nĩmarumaga maũndũ o mothe marĩa matoĩ; namo marĩa moĩ na ũmenyi ũrĩa wa mũciarĩre, ta nyamũ iria itarĩ na meciria, nĩmo meninaga namo.

11

Kaĩ marĩ na haaro-ĩ!. Amu nĩ kũgera maageragĩra njĩra ĩrĩa ya Kaini, makarũmanagĩrĩra na ihĩtĩa rĩrĩa rĩa Balaamu o mahĩkĩrĩirie, nĩ getha magwate mũcara, na makaninwo nĩ ũndũ wa gũũkĩrĩra wathani o ta Kora.

12

Acio-rĩ, hĩndĩ ĩrĩa mokaga kũrĩanĩra na inyuĩ maruga-inĩ manyu ma kĩendano, matariĩ ta mahiga matekuoneka marĩa mahĩnganaga, makĩrĩ arĩithi arĩa merĩithagia o ene mategwĩtigĩra; nĩ ta matu matarĩ na mbura marĩa matwaragwo nĩ rũhuho; matariĩ ta mĩtĩ hĩndĩ ĩrĩa ĩhũrũrũkite mathangũ mayo, ĩrĩa ĩtarĩ na kĩndũ iciarĩte, na yũmĩte biu, ĩgakũũrũo na mĩrĩ.

13

Ningĩ matariĩ ta makũmbĩ matangĩgirĩrĩka ma iria rĩrĩa inene, mahũyũkaga maũndũ mao ma njono ta mũhũyũ; o na mahaana ta njata iria itakindagĩria, ciigĩirũo ũirũ wa nduma o nginya tene na tene.

14

Ũhoro wa andũ acio-rĩ, nĩguo warathirũo nĩ Enoku o nake, mũndũ ũrĩa wa rũciaro rũa mũgwanja kuuma Adamu, akiuga, Atĩrĩrĩ, Mwathani okire me na arĩa ake atheru ngiri na ngiri,

15

nĩguo ahingĩrie andũ othe ituĩro rĩao, na ahoote cira-inĩ arĩa othe matetigagĩra Ngai, nĩ ũndũ wa mawĩko mao mothe ma kũrema Ngai, o marĩa maaneka matekũmwĩtigĩra, o na nĩ ũndũ wa maũndũ marĩa mothe moru maanoiga magĩcaambagia Ngai, makĩrĩ ehia maagĩte kũmwĩtigĩra.

16

Acio-rĩ, nĩ ang'ong'ori na ateti, makarũmanagĩrĩra na merirĩria mao moru, makaaragia na tũnua twao mohoro ma kwĩĩkĩrĩra, o makĩanjanjaga andũ nĩ getha mone kĩndũ.

17

No inyuĩ, endwa akwa, ririkanagai mohoro marĩa maanaario o mbere nĩ atũmwo a Mwathani witũ Jesu Kristo,

18

ũrĩa maamwĩraga atĩrĩ, Atĩ rĩrĩa matukũ marĩa ma kũrigĩrĩria magakinya, nĩgũgoka andũ anyũrarania marũmanagĩrĩra na merirĩria mao ma kwaga gũtĩa Ngai.

19

Nĩo matũmaga andũ maamũkane, magatũũra na mĩtũũrĩre ya kĩĩmwĩrĩ, na matitũũraga me na Roho.

20

No inyuĩ, endwa akwa, ikaragai mũkĩongererekaga hinya ũhoro-inĩ wanyu wa gwĩtĩkia wĩtĩkio ũrĩa mũtheru mũno, na mũhoyage mwĩ na Roho Mũtheru,

21

nĩ getha mwĩmenyagĩrĩre mũikarage o mwendetwo nĩ Ngai, na mũgĩtanyaga hĩndĩ ĩrĩa mũkaiguĩrũo tha nĩ Mwathani witũ Jesu Kristo, nĩguo mũkone muoyo ũrĩa ũtagathira.

22

Andũ amwe nao, arĩa,marĩi na mathangania, mũmaiguĩre tha;

23

na mũhonokie angĩ na kũmahuria moime mwaki-inĩ; angĩ nao mũmaiguĩre tha mwĩ na guoya, mũgĩthũũraga o na nguo ĩrĩa ĩĩkĩrĩtwo irooro nĩ mwĩrĩ.

24

Na rĩu-rĩ, we ũrĩa ũngĩhota kũmũgitĩra mũtikanahĩngwo, na kũmũrũgamia harĩa atũũraga harĩ riri, mũtarĩ na kaũũgũ, na mũkenete gĩkeno o kĩrĩa kĩnene-rĩ,

25

o we ũrĩ Ngai we wiki na Mũtũhonokia ũtũhonoketie na ũndũ wa Mwathani witũ Jesu Kristo, arogĩaga na riri, na ũkaru, na wathani, o na ũhoti, o mbere ya mĩndĩ na mĩndĩ, o na rĩu, o na nginya tene na tene. Amen.

IBUKU RĨA ŨHORO ŨRĨA MWEGA (2007)
JUDASI

MARŨA KUUMA KŨRĨ JUDASI

1 Kuuma kũrĩ niĩ Judasi, ndungata ya Jesũ Kristũ, o niĩ mũrũ wa nyina na Jakubu:
Kũrĩ andũ arĩa meetĩĩtwo, na matũũraga wendoinĩ wa Ngai Ithe, na nĩmamenyagĩrĩrwo ni Jesũ Kristũ:

2 Mũroingĩhĩrio tha, thaayũ o na wendani.

3 Eendwa aakwa, tondũ wa kũigua ndĩ na wendo wa kũmwandĩkĩra ũhoro wa ũhonokio ũrĩa tũgwatanĩire na inyui-rĩ, nĩndjronire kwagĩrĩire ndĩmwandĩkĩre o rĩmwe ndĩmũũmĩrĩrie, nĩ geetha mũthiĩ o na mbere kũrũĩrĩra wĩtĩkio ũrĩa Ngai aaheire andũ aake rĩmwe rĩa kũigana.

4 Nĩ amu gatagatĩinĩ gaitũ nĩgwatoonyire na hitho andũ arĩa matooi Ngai, andũ arĩa ũhoro wa ituĩro rĩrĩa rĩmanyiitĩĩte wandĩkirwo o tene. Andũ acio nĩ o magarũraga wega wa Ngai witũ makaũtua waganu, na makarega Jesũ Kristũ, o we wiki mũnene na Mwathani witũ

5 O na angĩkorwo ũhoro ũyũ nĩmũũĩ wega, nĩngũmũririkania ũrĩa Mwathania hĩndĩ ĩmwe aahonokirie ciana cia Isiraeli kuuma Misiri, no thuuthainĩ nĩacookire akĩniina arĩa maaregire gwĩtĩkia.

6 Taririkanaai araika arĩa maaregire gũikara harĩa maagĩrĩirwo nĩgũikara, makĩehera ũikaroini wao: Ngai nĩamooheete na mĩnyororo kũndũ kwĩ nduma nene tene na tene, ameetereirie Mũthenya ũcio Mũnene ũrĩa magaatuĩrwo.

7 Taririkanaai andũ a Sodomu na Gomora, o na matũũra marĩa maariganĩĩtie, ũrĩa andũ aakuo meekire maũndũ ma ũmaraaya, na makĩgĩa na mĩtugo ya arũme kwĩrirĩria arũme arĩa angĩ: maherithirio na mwaki wa tene na tene nĩ geetha matuĩke kĩonereria kũrĩ andũ oothe.

8 No taguo mathũũkagia mĩĩrĩ yao na ũndũ wa irooto, makanyarara wathani wa Ngai, na makaruma arja marĩ riiri kũu igũrũ.

9 O na Mikaeli mũraika ũrĩa mũnene rĩrĩa maakararanagia na Ngoma nũũ ũgũkuua mwĩrĩ wa Musa, ndageririe gũcookeria Ngoma na ciugo cia irumi no aamwĩrire atĩrĩ, "Mwathani arogũkaania."

10 No rĩĩrĩ, andũ acio nĩmamenagĩrĩria maũndũ moothe marĩa matahotaga kũmenya, namo marĩa mamenyaga na mũmenyere ta wa nyamũ nĩmeniinaga namo.

11 Kaĩ makĩrĩ thĩĩnainĩ-ĩ! Nĩ amu nĩmarũmĩrĩire njĩra ĩrĩa Kaini aagereire. Ningĩ nĩ ũndũ wa kwenda mbeeca nĩmetwarĩrĩirie ihĩtiainĩ rĩrĩa Balaamu eekire, o na nĩmaremeete ta Kora, nao makaaniinwo o taake.

12 Andũ aya mahaana ta icigo cia gĩko rĩrĩa megũũka thigũkũinĩ makĩrĩanĩra na inyuĩ matarĩ na thoni. O meciiragia o ũhoro wao eene. Ningĩ mathimbĩĩte ta matu matarĩ mbura, marĩa mahuruutagwo nĩ rũhuuho. Mahaana mĩtĩ ĩrĩa ĩtaciaraga ĩkinyĩrĩĩrwo nĩ hĩndĩ ya kũhũrũrũka mathangũi, ĩkamunywo na mĩri ĩkooma biũ.

13 Ningĩ mahaana ta makũmbĩ ma iriainĩ; mahũyũkaga ciĩko ciao cia gĩconoko ta mũhũũyũ. O mahaana ta njata iria ciũrũũraga, iria cigĩirwo nduma ĩrĩa ndumanu muno ya tene na tene.

14 Andũ acio nĩ o ũhoro wao warathirwo nĩ Enoku, ũrĩa wa rũciaro rwa mũgwanja kuuma hari Adamu, akiuga ũũ: "Mwathani nĩagooka na araika aake atheru ngiri nyingĩ

15 atuĩre andũ oothe, na aherithie arĩa oothe meekaga ciĩko iria maneeka iria ireganĩĩte na ũngai, o na amaherithie nĩ ũndũ wa ciugo ciothe njũru iria eehia manaaria cia kũmũcambia!"

16 Andũ aya nĩ ang'ong'ori na matiiganagĩra; marũmagĩrĩra merirĩria maao mooru; nĩ eegani na maheenagĩrĩria andũ arĩa angĩ nĩguo megune.

17 Ĩndĩ inyuĩ, eendwa aakwa, taririkanaai ũhoro ũrĩa mwerirwo o mbere nĩ atũmwo a Mwathani witũ Jesũ Kristũ.

18 Maamwĩrire atĩrĩ, "Rĩrĩa mahinda ma mũthia magaakinya nĩgũkaagĩa na anyũrũrania, arĩa makaarũmagĩrĩra merirĩria maao matarĩ ma ũngai."

19 Andũ acio nĩ o matũmaga andũ maamũkane, nĩ ũndũ matũũraga mũtũũrĩre wa kĩĩmwĩrĩ matarĩ na Roho.

20 No inyuĩ, eendwa aakwa, kiragĩrĩriai kũrũmia wĩtĩkio wanyu ũrĩa mũtheru mũno: Hooyagaai mwĩ na hinya wa Roho Mũtheru.

21 Ningĩ mwĩigeei thĩinĩ wa wendo wa Ngai, o mwetereire Mwathani witũ Jesũ Kristũ nĩ ũndũ wa tha ciake amũhe muoyo wa tene na tene.

22 Andũ arĩa marĩkoragwo na nganja-rĩ, maiguagĩreei tha;

23 arĩa angĩ mahonokagiei mũkĩ mũkamahuria kuuma mwakiinĩ, nao arĩa angĩ mũmaiguagĩre tha mũgĩtigagĩra, no mũthũũre nguo ciao iria ithaahĩitio nĩ maũndũ moru ma mĩĩrĩ yao.

24 Na rĩu kũrĩ ũrĩa wĩ na ũhoti wa kũmũrũũgamia mũtikagũe, na kũmũrũũgamia mbere ya riiri wake mũtarĩ na ũcuuke na mwĩ na gĩkeno,

25 we Ngai Mũhonokia witũ, na ũndũ wa Jesũ Kristũ Mwathani witũ arogĩa na riiri, ũnene, ũthamaki, na wathani, kuuma o kĩambĩrĩria na rĩu na nginya tene na tene! Ameni.


UhoroMwega

ADS