KASISI w3Cert.
IbukuNgai

FILEMONA

IBUKU RĨA NGAI (1965)
FILEMONA

1 NĨ niĩ Paulo, njohetwo nĩ ũndo wa Kristo Jesũ, o na Timotheo, mũrũ wa Ithe witũ, twagũtũmĩra marũa maya, wee Filemona, ũrĩa twendete mũno, na ũtũire ũrutaga wĩra o ũndũ ũmwe na ithuĩ,

2 na tũgatũmĩra Apufia, mwarĩ wa Ithe witũ, o nawe Arikipo, o wee ũrũagĩrĩra Ũhoro wa Ngai hamwe na ithuĩ, o na andũ a kanitha ũrĩa ũrĩ gwaku mũciĩ.

3 Mũrogĩa na Wega o na thayũ, ciumĩte kwĩ Ngai Ithe witũ, o na Mwathani Jesũ Kristo.

4 Atĩrĩrĩ, rĩrĩa ngũgwetaga mahoya-inĩ makwa-rĩ, nĩnjokagĩria Ngai wakwa ngatho hĩndĩ ciothe,

5 nĩ ũndũ wa kũigua ũrĩa ũtũire wendaga na ũkehoka Mwathani Jesũ, o na andũ arĩa othe aamũre.

6 Na nĩ'hoyaga atĩ ngwatanĩro ĩo yao, yumanĩte na wĩtĩkio waku, ĩgĩe na ũhoti wa kũmahotithia kũmenya mawega mothe marĩa monekaga kũrĩ ithuĩ nĩ ũndũ wa Kristo.

7 Nĩ gũkorũo nĩ gũkena ngenete mũno na ngomĩrĩrio ngoro nĩ ũndũ wa wendani waku,, kuona atĩ ngoro cia andũ arĩa aamũre nĩicanjamũrĩtwo nĩwe, wee mũrũ wa Ithe witũ.

8 Hakĩrĩ ũgũo-rĩ, o na ndahota kũmĩrĩria gũgwatha, nĩ ũndũ wa Kristo, atĩ wĩke ũrĩa wagĩrĩire-rĩ,

9 ndenda kaba ngũthaithe ũwĩke nĩ ũndũ wa wendani. Ũguo noguo niĩ Paulo, ndĩ mũthuri mũkũrũ, na rĩu ndĩ muohe nĩ ũndũ wa Kristo Jesũ-rĩ,

10 ngũgĩgũthaitha nĩ ũndũ wa mwana wakwa ũrĩa njiarĩire gũkũ kĩoho-inĩ, nĩwe Onesimo [wĩ uumithio].

11 Nake tene ndaarĩ na kĩene harĩ wee, no rĩu nĩ mũndũ wĩ na kĩene harĩ wee o na harĩ niĩ.

12 Nake nĩwe ũyũ ndamũcokia kũrĩ wee, na no ta gũtũma ndagũtũmĩra ngoro yakwa mwene.

13 Na nĩingĩendete tũikare nake, nĩ getha andungatagĩre ithenya rĩaku kĩoho-inũ gĩkĩ njohetwo nĩ ũndũ wa Ũhoro-ũrĩa-Mwega.

14 Ĩndĩ ndirĩ ũndũ o na ũrĩkũ ingĩĩka itoĩ ũrĩa ũngĩenda, nĩ getha wega ũrĩa ũngĩĩka ndũgagĩtuĩke wa kũringĩrĩrio, no ũtuĩke wa kwĩendera.

15 Tondũ no gũkorũo gĩtũmi kĩrĩa kĩratũmire eherio kũrĩ wee kahinda no getha, aarĩkia gũgũcokerera, mũtũũranie nake o tene na tene;

16 na ningĩ atĩ ndagacoke arĩ o ngombo, tiga o akĩrĩte ngombo, acoke arĩ mũrũ wa Ithe witũ mwende mũno. Na rĩrĩ, akorũo nĩ mũndũ mwende mũno nĩ niĩ-rĩ, githĩ ndaagĩrĩirũo nĩ kwendwo nĩwe mũno makĩria ũhoro-inĩ wa mwĩrĩ, o na wa Mwathani?

17 Tondũ wa ũguo, ũngĩkorũo nĩũtuaga atĩ tũrĩ rũmwe nawe, mwĩtĩkĩre o taa ũrĩa ũngĩnjĩtĩkĩra niĩ mwene.

18 Nake angĩkorũo nĩagwĩkĩte ũũru ona ũrĩkũ kana hihi arĩ na thirĩ waku-rĩ, ũwandĩke ũtuĩke wakwa.

19 Nĩ niĩ Paulo ndaandĩka na guoko gwakwa mwene atĩrĩ, niĩ nĩ niĩ ngarĩha thirĩ ũcio: ndingĩkĩenda kũgweta thirĩ witũ nawe, o ũrĩa wa muoyo waku.

20 Ĩĩ, nĩguo, mũrũ wa Ithe witũ, reke nyone ũteithio uumĩte kũrĩ wee thĩinĩ wa Mwathani: ta njanjamũra ngoro, ndĩ o thĩinĩ wa Kristo.

21 Ngũkwandĩkĩra marũa maya ndĩhokete atĩ ndũngĩnema, na ngamenya atĩ nĩũgwĩka maũndũ macio njugĩte, o na ũkĩrĩrĩrie.

22 Hamwe na ũguo-rĩ, 'thondekera handũ ha gũikara : amu nĩnjĩrĩgĩrĩire atĩ nĩndĩrĩĩtĩkĩrio njũke kũrĩ inyuĩ, nĩ ũndũ wa mahoya marĩa mũ’hoyagĩra.

23 Epafara, ũrĩa tuohetwo ũndũ ũmwe nake nĩ ũndũ wa Kristo Jesũ, nĩaakũgeithia;

24 nao aa Mariko na Arisitariko, na Dema, na Luka, arĩa tũrutithanagia wĩra nao, nĩmaakũgeithia o nao.

25 Wega wa Mwathani witũ Jesũ Kristo ũrogĩa na maroho manyu. Amen.

IBUKU RĨA ŨHORO ŨRĨA MWEGA (2007)
FILEMONA

1 Kuuma kũrĩ niĩ Paũlũ, a niĩ njoheetwo nĩ ũndũ wa Kristũ Jesũ, o na kuuma kũrĩ Timotheo mũrũ wa Ithe witũ:
Kũrĩ mũraata witũ Filemona, o wee tũrutithanagia ,wĩra nawe,

2 o hamwe na andũ a kanitha ũrĩa ũcemanagia gwaku mũciĩ. O na kũrĩ mwarĩ wa Ithe witũ Apufia, na Arikipo ũrĩa tũrũagĩra Ũhoro wa Ngai naake:

3 Wega na thaayũ wa Ngai Ithe witũ o na wa Mwathani Jesũ Kristũ ũrogĩa na inyuĩ.

4 Atĩrĩrĩ, mũrũ wa Ithe witũ Filemona, hĩndĩ ciothe rĩrĩa ndakũririkana mahooyainĩ maakwa-rĩ, nĩnjookagiria Ngai wakwa ngaatho.

5 Amu nĩnjiguaga ngumo ya ũrĩa Mwathani Jesũ, o na ũrĩa wendeete andũ oothe a Ngai.

6 Mahooya maakwa nĩ atĩ wĩtĩkio ũcio mũnyiitanĩire nao ũgĩtũme mũrikĩre mũmenye mũno ũhoro wa iraathimo ciothe iria tũheagwo nĩ ũndũ wa gũkorwo twĩ thĩinĩ wa Kristũ.

7 Wendo waku, mũrũ wa Ithe witũ, nĩũtũmĩte ngĩe na gĩkeno kĩnene mũno na ũkanyũmĩrĩria mũno! Ningĩ wee nĩũcanjamũrĩte ngoro cia andũ a Ngai ũkameekĩra hinya.

8 Nĩ ũndũ ũcio, o na gũtũika no ngwathe thĩinĩ wa Kristũ atĩ wĩke ũndũ ũrĩa ũbatarainie-rĩ,

9 niĩ Paũlũ, barũũthi wa Jesũ Kristũ, na rĩu nĩkuohwo njoheetwo nĩ ũndũ wake, nĩngũgũthaitha nĩ ũrĩa ngwendeete.

10 Kwoguo ngũgũthaitha nĩ ũndũ wa mwana wakwa Onesimo [wa bata], ũrĩa nduĩkĩte ithe thĩinĩ wa Kristũ ndĩ njeera.

11 Hau kabere Onesimo ndararĩ mũndũ wa bata harĩ wee, no rĩu nĩatukĩĩte mũndũ wa bata kũna harĩ we o na harĩ niĩ.

12 Rĩu-rĩ, nĩndamũcookia kũrĩ wee, na ngĩmũtũma no ta ngoro yakwa mwene ndagũtũmĩra.

13 Nĩingĩrendire tũikarage naake nĩ geetha andungatagĩre handũ haaku rĩu njoheetwo nĩ ũndũ wa Ũhoro ũrĩa Mwega.

14 No rĩĩrĩ, ndĩragĩciiria atĩ ndiagĩrĩirwo nĩgwĩka ũguo wee ũtooĩ, nĩguo ndikaahaane ta ndĩrahũthĩra ũtaana waku na hinya; kaba wee ũkorwo wĩyendeire.

15 No gũkorwo ihinda o rĩu iniini arehereete kuuma harĩ we, arehereete nĩguo acooka ũtũũranie naake matũka macio mangĩ moothe.

16 Rĩu ndegũcooka atariĩ ta ngombo, no egũkorwo e kĩndũ kĩnene gũkĩra ngombo. Harĩ niĩ-rĩ, egũkorwo e mũrũ wa Ithe witũ nyendeete mũno. Angĩkorwo ũguo nĩguo ahaana harĩ niĩ-rĩ, harĩ wee akĩagĩrĩirwo gũkorwo ahaana ũguo makĩria: ta ngombo na ta mũrũ wa Ithe witũ thĩinĩ wa Mwathani!

17 Angĩkorwo nĩũtuite atĩ twĩ rũmwe nawe, mwamũkĩre o ta ũrĩa ũngĩnyamũkĩra niĩ mwene.

18 Angĩkorwo nĩakũhĩtĩirie kana agakorwo aarĩ na thiirĩ waku-rĩ, reke ngaakũrĩha arĩ niĩ.

19 Haaha nĩ niĩ Paũlũ ndaandĩka na guoko gwakwa: Nĩngaarĩha (ndiagĩrĩirwo nĩkũgweta atĩ o nawe mwene wĩ thiirĩ wakwa).

20 Kwoguo mũrũ wa Ithe witũ, reke ngĩe na uumithio kuuma kũrĩ wee nĩ ũndũ wa Mwathani; njanjamũra ngoro ta marũ wa Ithe witũ thĩinĩ wa Mwathani.

21 Ngĩkwandĩkĩra marũa maya ndĩ na ma atĩ ndũngĩaga kũnjathĩkĩra, o na atĩ nĩũgwĩka o na makĩria ya ja njugĩĩte.

22 22 Hamwe na ũguo thondekera handũ ha gũikara amu ndĩ na mwĩhoko atĩ nĩ ũndũ wa mahooya marĩa mũhooyagĩra nĩndĩĩtĩkĩrio njũke kũrũ inyuĩ.

23 Epafara ũrĩa twoheetwo naake nĩ ũndũ wa Kristũ Jesũ nĩakũgeithia,

24 o na nĩwageithio nĩ andũ arĩa tũrutithanagia wĩra nao, nĩ o Mariko, Arisitariko, Dema na Luka.

25 Wega wa Mwathani witũ Jesũ Kristũ ũrogĩa na inyuĩ inyuothe.


UhoroMwega

ADS