KASISI w3Cert.
IbukuNgai

1 JOHANA 2

IBUKU RĨA NGAI (1965)
1 JOHANA 2

1 TWANA twakwa, ngũmwandĩkĩra maũndũ maya nĩguo mũtikehagie. Na mũndũ ehia, twĩ na Mũtũcirĩrĩri harĩ Ithe witũ, na nĩwe Jesu Kristo, ũrĩa mũthingu,

2 nake nĩwe ihaki rĩa mehia maitũ; na to maitũ ithuiki, nĩ rĩa mehia ma kĩrĩndĩ gĩa thĩ gĩothe o nakĩo.

3 Na ũndũ ũrĩa ũtũmaga tũmenye atĩ nĩtũmũũĩ nĩ atĩrĩ, twatũũra tũmenyereire maathani make.

4 Ũrĩa uugaga ũũ, Nĩndĩmũũĩ, na ndamenyagĩrĩra maathani make, ũcio nĩ wa maheni, na ũhoro-ũrĩa-wa-ma ndarĩ naguo ngoro yake;

5 no rĩrĩ, ũrĩa ũtũire o amenyagĩrĩra ũhoro wake, thĩinĩ wa ũcio-rĩ, kwenda Ngai nĩgũkinyanĩire kũna. Ũndũ ũrĩa ũtũmaga tũmenye twĩ thĩinĩ wake nĩ ũyũ:

6 ũrĩa uugaga atĩ nĩatũire thĩini wake, aagĩrĩirũo o nake mwene agĩage na mĩthiĩre ta ĩrĩa we aarĩ nayo.

7 Endwa akwa, ti rĩathani rĩerũ ngũmwandĩkĩra, tiga rĩathani rĩa tene rĩrĩa mũtũire narĩo kuuma kĩambĩrĩria; rĩathani rĩu rĩa tene nĩ ũhoro ũrĩa mwaheirũo.

8 Ningĩ no rĩathani rĩerũ ngũmwandĩkĩra, na nĩ ũhoro wa ma kũrĩ we o na kũrĩ inyuĩ; nĩ gũkorũo nduma no ĩrathira, naguo ũtheri ũrĩa wa ma rĩu nĩũrĩkĩtie gũthera.

9 Ũrĩa uugaga atĩ arĩ na ũtheri-rĩ, na nĩathũire mũrũ wa ithe-rĩ, arĩ o nduma-inĩ o na rĩu.

10 Ũrĩa wendete mũrũ wa ithe nĩatũire ũtheri-inĩ, na thĩinĩ wake gũtirĩ na ũndũ ũngĩtũma ahĩngwo.

11 No rĩrĩ, ũrĩa ũthũire mũrũ wa ithe e nduma-inĩ, na gũthiĩ athiaga o na nduma, na ndonaga harĩa ekũgera, tondũ nduma nĩĩmũteete maitho.

12 Ndĩramwandĩkĩra inyuĩ, twana twakwa, nĩ ũndũ nĩmuoheirũo mehia manyu nĩ ũndũ wa rĩĩtwa rĩake.

13 Ndĩramwandĩkĩra inyuĩ, maithe, nĩ ũndũ nĩmũũĩ ũrĩa ũtũire kuuma o kĩambĩrĩria. Ndĩramwandĩkĩra inyuĩ, aanake, nĩ ũndũ nĩmũtoretie ũrĩa mũũru. Inyuĩ ciana-rĩ, ndamwandĩkĩra nĩ nĩmũũĩ ũndũ Ithe witũ.

14 Inyuĩ maithe-rĩ, ndamwandĩkĩra nĩ ũndũ nĩmũũĩ ũrĩa ũtũire kuuma o kĩambĩrĩria. Inyuĩ aanake-rĩ, ndamwandĩkĩra nĩ ũndũ mwĩ na hinya, naguo Ũhoro wa Ngai nĩũikaire thĩinĩ wanyu, na nĩmũtoretie ũrĩa mũũru.

15 15 Mũtikende ũhoro wa thĩ, o na kana maũndũ marĩa me kuo gũkũ thĩ. Mũndũ aakorũo nĩenda ũhoro wa thĩ, kwenda Ithe witũ ndarĩ nakuo ngoro yake.

16 Amu-rĩ, maũndũ mothe marĩa me gũkũ thĩ, mwĩrirĩrio wa mwĩrĩ, na mwĩrirĩrio wa maitho, na nguthi cia muoyo ũyũ tũrĩ-rĩ, maũndũ macio matiumanĩte na Ithe witũ, nĩ ma thĩ.

17 Na thĩ nĩ gũthira ĩrĩthira, o na mwĩrirĩrio wayo; no rĩrĩ, ũrĩa wĩkaga ũrĩa Ngai endaga, ũcio nĩ wa gũtũũra nginya tene o na tene.

18 Ciana ici, ĩno nĩyo thaa ya kũrigĩrĩria; na ta ũrĩa mwaiguire atĩ mũmena-Kristo nĩegũũka, o na rĩu nĩkũgĩĩte amena-Kristo aingĩ; na tondũ ũcio tũkamenya atĩ ĩno nĩyo thaa ya kũrigĩrĩria.

19 Kuuma nĩmoimire kũrĩ ithuĩ, no matiarĩ aitũ; amu mangĩakorirũo marĩ aitũ, nĩmangĩaikarire hamwe na ithuĩ; no nĩmaatũtigire, nĩ getha moimbũke mamenyeke atĩ othe ti aitũ.

20 Inyui-rĩ, mũrĩ ahake maguta nĩ Ũrĩa Mũtheru, mũgakĩmenya maũndũ mothe.

21 Ndiamwandĩkĩra nĩ ũndũ atĩ mũtiũĩ ũhoro-ũrĩa-wa-ma ; ndamwandĩkĩra nĩ ũndũ nĩmũũũĩ, na tondũ gutirĩ ũhoro wa mathara, o na ũrĩkũ, ũkoragwo uumanĩte na ũhoro-ũrĩa-wa-ma.

22 Ũrĩa wa mathara nũ, tiga ũrĩa ũkaanaga atĩ Jesu tiwe Kristo? Ũcio nĩwe mũmena-Kristo, ũcio ũkaanaga Ithe witũ na agakaana Mũriũ.

23 Ũrĩa o wothe ũkaanaga Mũriũ, ũcio ndarĩ na Ithe witũ; ũrĩa wĩtĩkĩtie Mũriũ arĩ na Ithe o nake.

24 Inyuĩ-rĩi, ũhoro ũrĩa mwarutirie kũigua kĩambĩrĩria-inĩ, tũũrai o naguo ngoro-inĩ cianyu. Ũhoro ũcio mwarutirie kũigua kĩambĩrĩria-inĩ wagĩtũũra thĩinĩ wa ngoro cianyu-rĩ, inyuĩ na inyuĩ mũgũtũũra thĩinĩ wa Mũriũ o na thĩinĩ wa Ithe witũ.

25 Naguo ũguo nĩguo kĩĩranĩro kĩrĩa aatwĩrĩĩre, o muoyo wa tene na tene.

26 Nĩndamwandĩkĩra maũndũ macio ha ũhoro-inĩ wa arĩa mendaga kmũhĩtithia.

27 Na inyuĩ-rĩ, ihaka rĩa maguta rĩrĩa mwahakirũo nĩwe mũtũire o narĩo ngoro-inĩ cianyu, na mũtibatairio nĩ kũrutwo ũhoro nĩ mũndũ; no rĩrĩ, ta ũrĩa ihaka rĩake rĩmũrutaga ũhoro wa maũndũ mothe, na nĩ rĩa ma, ti rĩa maheni, o na taũrĩa rĩakĩmũrutire-rĩ, tũũrai thĩinĩ wake.

28 Na rĩu, twana twakwa, tũũragai o thĩinĩ wake, nĩ getha o rĩrĩa akonithanio-rĩ, tũgakĩhota kũũmĩrĩria na tũticonoke mbere yake oka.

29 Ongorũo nĩmũũĩ nĩ mũthingu, menyai atĩ o ũrĩa nake wĩkaga maũndũ ma ũthingu nĩaciarĩtwo nĩwe.

IBUKU RĨA ŨHORO ŨRĨA MWEGA (2007)
1 JOHANA 2

1 Ũhoro ũyũ nĩ inyuĩ twana twakwa ndĩrandĩkĩra nĩ geetha mũtikeehagie; no rĩĩrĩ, mũndũ angĩĩhia twĩna ũrĩa ũtũthaithanagĩrĩra harĩ Ngai Ithe, na nĩ we Jesũ Kristũ ũrĩa mũthingu.

2 Kristũ nĩ we ũtũmaga tuoherwo meehia maitũ, na to maitũ moiki, no nĩ o na meehia ma andũ oothe.

3 Korwo twathĩkĩra maathani ma Ngai no tũkorwo twĩ na ma atĩ nĩtũmũmenyeete.

4 Mũndũ ũrĩa uugaga atĩ nĩamũũĩ na ndathĩkagĩra maathani maake, nĩ wa maheeni na ndarĩ na ũhoro wa ma thĩinĩ wake.

15 No ũrĩa wathĩkagĩra ũhoro wake nĩakoragwo eendeete Ngai na wendo ũrĩa mũkinyanĩru. Ũũ nĩguo tũngĩhota kũmenya na ma atĩ twĩ rũmwe na Ngai:

6 omũndũ ũrĩa uugaga atĩ aikaraga thĩinĩ wa Ngai aagĩrĩĩrwo nĩgũikaraga ta ũrĩa Jesũ Kristũ aikaraga.

7 Eendwa aakwa, rĩathani rĩrĩa ndĩramwandĩkĩra ti rĩerũ, no rĩrĩa ikũrũ mũtũũraga narĩo kuuma o kĩambĩrĩria. Rĩathani rĩu ikũrũ nĩ ũhoro o ũrĩa mũrĩĩkĩĩtie kũigua.

8 No rĩĩrĩ, nĩ rĩathani rĩerũ ndĩramwandĩkĩra, naake Kristũ o hamwe na inyuĩ atĩ ũndũ ũcio nĩ wa ma, nĩ amu nduma nĩreehera, na ũtheri ũrĩa wa ma nĩũramũrĩka.

9 Mũndũ ũrĩa uugaga atĩ e ũtheriinĩ, na nĩathũire mũrũ kana mwarĩ wa ithe arĩ o ndumainĩ.

10 Mũndũ ũrĩa wendeete mũrũ kana mwarĩ wa ithe akoragwo arĩ ũtheriinĩ, na gũtirĩ ũndũ o na ũmwe wĩ thĩinĩ wake ũngĩtũma mũndũ ungĩ eehie.

11 No mũndũi ũrĩa ũthũire mũrũ wa ithe e ndumainĩ, na akoragwo akĩgerera ndumainĩ, na ndooĩ kũrĩa arathiĩ, nĩ amu nduma nĩyamũtuire mũtumuumu.

12 Ndĩramwandĩkĩra inyuĩ twana twakwa, nĩ tondũ nĩmuoheirwo meehia maanyu nĩ ũndũ wa ũrĩa Kristũ eekire.

13 Ndĩramwandĩkĩra inyuĩ maithe nĩ tondũ nĩmũũĩ ũrĩa ũtũũraga muoyo kuuma o kĩambĩrĩria. Ndĩramwandĩkĩra inyuĩ andũ eethĩ nĩ tondũ nĩmũhooteete Ũrĩa Mũũru.

14 Ndamwandĩkĩra inyuĩ ciana ciakwa nĩ tondũ nĩmũũĩ Ngai Ithe. Ndĩramwandĩkĩra inyuĩ maithe nĩ tondũ nĩmũũĩ ũrĩa ũtũũraga muoyo kuuma o kĩambĩrĩria. Ndĩramwandĩkĩra inyuĩ andũ eethĩ nĩ tondũ mwĩ na hinya, na ũhoro wa Ngai nĩũikaraga thĩinĩ wanyu, na nĩmũhooteete ũrĩa mũũru.

15 Mũtikaae kwenda thĩ kana indo iria ikoragwo kuo. Mũndũ ũrĩa wendeete thĩ ndeendeete Ngai Ithe.

16 Amu maũndũ moothe ma thĩ, ta merirĩria ma mwĩrĩ, ma maitho, o na kana mwĩtĩĩo nĩ ũndũ wa indo cia gũũkũ thĩ, macio moothe matikoragwo moimĩĩte kũrĩ Ngai Ithe nĩ ma gũũkũ thĩ.

17 Thĩ o hamwe na merirĩria maayo nĩgũthira irathira; no mũndũ ũrĩa wĩkaga wendi wa Ngai atũũraga tene na tene.

18 Ciana ciakwa, rĩrĩ nĩrĩo ihinda rĩa mũthia! Na rĩĩrĩ, o ta ũrĩa mwaiguire atĩ Thũ ya Kristũ nĩgooka, rĩu thũ cia Kristũ nĩ nyingĩ ciũkĩĩte, na kwoguo nĩtũkĩmenyeete atĩ rĩĩrĩ nĩrĩo ihinda rĩa mũthia.

19 Andũ acio nĩmeehereete ngwatanĩroinĩ iitũ tondũ matiarĩ aayo; korwo maarĩ a ngwatanĩro iitũ nĩmangĩikarĩte hamwe na ithuĩ. No meeherire nĩ geetha kuoneke wega atĩ o matiarĩ a ngwatanĩro iitũ.

20 ĩndĩ inyuĩ nĩmũitĩrĩirio Roho Mũtheru nĩ Kristũ, na kwoguo inyuothe nĩmũmenyeete ũhoro wa ma.

21 Niĩ ndiramwandĩkĩra atĩ tondũ mũtiũĩ ũhoro wa ma, no ndĩramwandĩkĩra tondũ nĩmũũĩ, na mũgakorwo mũmenyeete atĩ gũtirĩ maheeni moimaga ũhoroinĩ wa ma.

22 Mũndũ ũrĩa ũkĩheenanagia nĩ ũrĩkũ? Nĩ ũrĩa o wothe uugaga atĩ Jesũ ti Kristũ. Mũndũ ũcio nĩ we thũ ya Mesia, na nĩareganĩte na Ngai Ithe na Mũũriũ.

23 Ũrĩa ũreganĩĩte na Mũũriũ nĩareganĩĩte na Ithe, no ũrĩa wĩtĩkĩrĩĩte Mũũriũ nĩetĩkĩrĩĩte Ithe o naake.

24 Ũhoro ũrĩa mwaiguire kuuma o kĩambĩrĩria rekeei ũikare thĩinĩ wanyu. Ũhoro ũcio ũngĩikara thĩinĩ wanyu nĩmũrĩikaraga mwĩ thĩinĩ wa Mũũriũ o na mwĩ thĩinĩ wa Ithe.

25 Naguo ũndũ ũrĩa Kristũ aatwĩrĩire nĩ muoyo wa tene natene.

26 Ndamwandĩkĩra ũhoro ũyũ nĩ ũndũ wa andũ arĩa meendaga kũmũhĩtithia.

27 No rĩrĩ, Roho ũrĩa mwaitĩrĩirio nĩ Kristũ e thĩinĩ wanyu na kwoguo mũtirĩ na bata wa kũrutwo ũndũ nĩ mũndũ, nĩ amu Roho ũcio nĩamũrutaga maũndũ moothe ma ma no ti ma maheeni, na kwoguo o ta ũrĩa amũrutĩĩte ikaragaai mwĩ thĩinĩ wa Kristũ.

28 Atĩrĩĩrĩ twana twakwa, ikaragaai mwĩ thĩinĩ wake nĩ geetha hĩndĩ ĩrĩa agooka tũgaakorwo tũrĩ na ũũmĩrĩru tũtikaanehithe nĩgũconoka.

29 Angĩkorwo nĩmũũĩ atĩ Kristũ nĩ mũthingu, kĩmenyageei atĩ mũndũ ũrĩa wĩkaga ũrĩa kwagĩrĩire nĩ mwana wa Ngai.


UhoroMwega

ADS