KASISI w3Cert.
IbukuNgai

1 JOHANA 1

IBUKU RĨA NGAI (1965)
1 JOHANA 1

1 ŨRĨA warĩ o kuo kuuma kĩambĩrĩria, ũrĩa tũiguĩte, ũrĩa tuonete na maitho maitũ, ũrĩa tweroreire, namo moko maitũ makĩũnyitanga, Ũhoro-inĩ ũrĩa wĩ muoyo

2 (amu muoyo ũcio nĩwonithanirio, na ithuĩ nĩtũwonete, na tũkaheana ũira, tũkamuumĩrĩria inyuĩ ũhoro wa muoyo ũcio, o ũcio wa tene na tene; watũire gwĩ Ithe witũ, na ũkĩonithio ithuĩ);

3 ũrĩa tuonete na tũkaigua, o na inyuĩ nĩtũgũkĩmũũmĩrĩria, nĩ getha o na inyuĩ mũgĩe ngwatanĩro na ithuĩ; nayo ngwatanĩro iitũ nĩ ngwatanĩro na Ithe witũ, ningĩ na Mũrũ wake Jesu Kristo;

4 na tũkũmwandĩkĩra maũndũ maya nĩ getha gĩkeno giitũ kĩiganĩre.

5 Naguo ũhoro ũrĩa tũiguĩte kũrĩ we, ũrĩa tũgũgĩcoka kũmũhe inyuĩ, nĩ atĩrĩ, atĩ Ngai nĩ ũtheri, na thĩinĩ wake gũtirĩ gatuma o na kanini.

6 Twoiga atĩ twĩ ngwatanĩro nake, tũgĩthiaga o na nduma-rĩ, nĩ maheni tũkuuga, na tũtiĩkaga maũndũ marĩa ma ma;

7 no akorũo tũthiaga a na ũtheri, ta ũrĩa we arĩ ũtheri-inĩ, twĩ na ngwatanĩro, mũndũ na ũrĩa ũngĩ, nayo thakame ya Jesu Mũrũ wake nĩĩtũtheragia tũgathira wĩhia wothe.

8 Twoiga tũtirĩ na wĩhia nĩ kwĩhenia tũkwĩhenia, na ũhoro-ũrĩa-wa-ma tũtirĩ naguo ngoro ciitũ.

9 Twakiumbũra mehia maitũ, we nĩ mwĩhokeku, o na nĩ mũthingu, agatuohera mehia maitũ, na agatũtheria tũgathirũo nĩ maũndũ marĩa mothe matarĩ ma ũthingu.

10 Twoiga tũtiĩhĩtie, tũkũmũtua wa maheni, na ũhoro wake tũtirĩ naguo ngoro ciitũ.

IBUKU RĨA ŨHORO ŨRĨA MWEGA (2007)
1 JOHANA 1

1 Tũramwandĩkĩra Ũhoro ũkoniĩ Kiugo kĩa muoyo, ũrĩa ũtũire kuo kuuma o kĩambĩrĩria. We Kiugo, ithuĩ nĩtũmũiguĩte na nĩtũmuoneete na maitho maitũ, na tũkamwĩrorera o na tũkamũhuutia na mooko maitũ.

2 Hĩndĩ ĩrĩa muoyo ũcio waguũranĩirio nĩtwawonire, na nĩkĩo twaragia ũhoro waguo tũkĩmwĩraga ũhoro wa muoyo wa tene na tene, ũrĩa warĩ hamwe na Ngai Ithe, o ũrĩa twamenyithirio ithuĩ.

3 Ũndũ ũrĩa ithuĩ tweyoneire na tũkĩĩiguĩra nĩguo tũmũmenyithagia ũhoro waguo, nĩ geetha o na inyuĩ mũnyiitanĩre na ithuĩ ngwatanĩroinĩ ĩrĩa tũkoragwo nayo na Ngai Ithe na Mũũrũwe Jesũ Kristũ.

4 Tũramwandĩkĩra ũndũ ũyũ nĩ geetha gĩkeno giitũ gĩtuĩke gikinyanĩru.

5 Ũhoro ũyũ nĩguo ithuĩ twaiguire kuuma kũrĩ Mũũrũwe na nĩguo tũmũmenyithagia atĩ: Ngai nĩ ũtheri, na thĩinĩ wake gũtirĩ gatuma o na kaniini.

6 Tũngiuga atĩ twĩ na ngwatanĩro naake na tũkoragwo tũikarĩĩte o ndumainĩ nĩtũraheenania na ciugo na ciĩko ciitũ.

7 No tũngĩikara ũtheriinĩ, ta ũrĩa we arĩ ũtheriinĩ, tũrĩkoragwo na ngwatanĩro gatagatĩinĩ gaitũ, nayo thakame ya Mũũriũ Jesũ nĩrĩtũtheragia tũgathirwo nĩ meehia moothe.

8 Tũngiuga atĩ tũtirĩ na meehia nĩkwĩheenia tũkwĩheenia, na tũtirĩ na ũhoro wa ma thĩinĩ witũ.

9 No tũngiumbũrĩra Ngai meehia maitũ nĩegũtuohera na atũtherie meehia maitũ moothe, tondũ we nĩahingagia ũrĩa eeranĩire na nĩ wa kĩhooto.

10 Tũngiuga atĩ tũtiĩhĩĩtie tũgũtua Ngai wa maheeni na ũhoro wake ndũrĩ thĩinĩ witũ.


UhoroMwega

ADS